Meghalaya a·doko National Education Policy (NEP) 2020-ko August 1 tarikoni ra∙gate gitalgipa academic session ba skia porani bilsi a·bachengaoni ra∙gatchina NEHU uamang baksa bakrimgipa college-rangko ge∙etangaha. Iako a∙dokni pilak chadamberangni namgnina dakenga ine NEHU-ni Vice-Chancellor Prof. Prabha Shankar Shukla aganangaha. Postgraduate gadangni chatro chatrirangna NEP-ko 2022-23 bilsirangni academic session-na a∙bachengataha. NEHU iani bidingo chittirangko gimik college-rangna sualate NEP-ko tarakale undergraduate gadangoba ra∙gatchina didiata ine Vice Chancellor parakangaha. Iako dakanichi bachelor degree chu∙gimik bilsi brina ong∙genok ine ua agandapangaha. Bilsi brini programme-ko ra∙gatna neng∙nikgipa college-rang NEHU baksa golpogrike bilsisana senge somoi ra∙na man∙skagen.
Chief Minister Conrad Sangma ma∙mongni Union Education Minister na u∙iatani gitade a∙dokni skulrango NEP-ko ra∙gatna neng∙nikaniko man∙kuenga ine janapanga gnang. Ia neng∙nikanirangara skulrango rika cho∙anirang aro classroom rangni chu∙onggijani, skigiparangna tangka paisarang aro gital skiani cholrang donggijani ong∙a ine Sangma, Dharmendra Pradhan-na janape on∙angaha. NEHU chatro chatrirangna kamrangko ra∙baani cholrangko dal∙dapatna chanchisoenga aro iani bidingo dingtang dingtang Company-rang baksa bakrime academic aro industry-rangko namdaproroatna songgigrikaniko dakaha ine Shukla parakataha.
Meghalaya a∙dokni chadamberangna hajal dok biaprangko mikkangchina ra∙bae on∙anggen chongmotan graduate ong∙gipa chatro chatrirangkoba man∙chape tourism, chemistry, BTech, MBA a∙barango dangdike on∙anggen ine Shukla parakangaha. Unbaksana NEHU ni dropout ba poraianio bijangchio bon∙changdikanikoba komiatna jotton ka∙anggen ine ua u∙iataha.
