Re∙baenggipa August jani 3 oni 9 tarikona Basketball Federation of India (BFI) ni Puducherry-ni Rajiv Gandhi Stadium-o ong∙atna sienggipa chang 48 gipa Sub-Junior National Basketball Championship na, Meghalaya Basketball Association (MBA) a∙dokni palo kal∙susaanagipa chadamberangko July jani 17 tariko seokangaha.
Puducherry-o ong∙na sienggipa chang 48 gipa Sub-Junior National Basketball Championship-o Meghalaya a∙dok ni palo susaaniko dakangnagita Garo Hills aro Khasi Hills-ni chadamberang seokako man∙aha.
Garo Hills-a∙jaoni Puducherry-o kal∙susaana seokako man∙gipa chamdamberangara Don Bosco Higher Secondary Skul, Turani Te. Abarak K Sangma, Tra. Ame Chisime D Sangma, Tra. Yatchi N Sangma aro Sheerwood Skul, Turani Te. Apara Fistos A Sangma, United Baptist Institute Sec. Skul, Baghmara-ni Tra. Deimi Dorimit Talaska R Marak aro Jawahar Navodaya Vidyalaya Samiti, Baghmara-ni Tra. Mechira N Sangma, seokako man∙angaha.
Kal∙susaagiparangko re∙dilna ba nirokna gita South Garo Hills a∙jani Abhyan Changgu G. Momin Assistant Coach na seokako man∙angskaaha.
