South West Garo Hills a∙jani Ampati Mini Stadium-o a∙dok chigao bol-wa∙a chiring-chibisikrangko ripingani bidingo mikrakatani program-ko ong∙atangaha. Ia program-ko Garo Hills Environment Protection Society (GHEPS) baksa District Administration, Police Department, Social Forestry Division, Soil and Water Conservation aro Krima VI-ni ning∙o donggipa mondolirang baksa nangrime ong∙atangaha.
Ia programme-o ge 30 mondolini dilgiparang, officers aro Ampatio songdonggipa manderangba bakko ra∙angtokaha. Ia tom∙aniko GHEPS-ni Executive Member Roger Benny A Sangma dakdilangaha. Ampati-ni MLA Miani D.Shira mongsonggipa sokgipa ong∙e bakko ra∙angaha. Shira, a∙dok chiga-ko ripinganiko dakna sorkariosan pangchakaigija an∙tangtangni dakna bil amma gita dakchina aro mikkangchi namdapatna didiangaha.
Ia program-o Krima VI-ni Executive Secretary Wepstar G Sangma, a∙dok chigako, burung-bolgrim aro matburungrangko ka∙sae ripingani gimin skie on∙angaha. South West Garo Hills a∙jani SP Vikash Kumar-ba ia program-o, bol pangsako den∙genchim ong∙ode pang 10 ba pang 20 ge∙skana nanga aro indake dakanichi bol-wa∙a, burung bolgrim, chiring,chibisikrang aro an∙tangtangnaba mikkangchina neng∙nikaniko ra∙baani dongjawa ine didie aganangaha.
A∙dok chigako, burung bolgrimko gamchate ra∙e mikkangchina ripinganiko GHADC-ni Executive Member, Stevie Marak aro Ampati-ni MDC-ba aganangpaha. Society-ni President Chavan N Sangma, gitcham Deputy Commissioner aro GHEPS-ni advisor Hubert B.Marak, burung-bolgrim, chiring-chibisik aro matburungrangko ripinge, mikkangchi dandangrike janggi tangangna man∙a gita ku∙cholsan ja∙ku de∙e kamko ka∙angna agandapangaha.
