Tura-o Winter Capital ko nangani dongja ine KHNAM dolni mijal salni bako agananina A∙chik Conscious Holistically Integrated Krima (ACHIK) dolrang aganchakataniko dakangskaaha. ACHIK aro gipin NGO dolrangni Winter Capitalko mai miksonganio dabienga uko KHNAM dolni Working President Thomas Passah miksonganiko name ma∙sikujaenga ine ACHIK dolrang aganchakatskaaha.
Skanggipa, Passah ni India a∙song gimiko Himachal Pradesh a∙doksan damgni capital dongaia ine janapaniara kakketgipa ong∙ja maina Jammu and Kashmir, Karnataka, Maharashtra, Uttarakhand a∙dokrangba sin∙kari aro dingkarini skotong songjinmarang gnanggipa ong∙a. Uttar Pradesh o Prayagraj ko niam tariani skotong aro Lucknow ko niamrango pangchake nirok simsakna donatskaaha ine ACHIK dolrang jaksi ote aganataha.
Gnigipao, Tura-ko Winter Capital songna nanganiara kakketgipa dabiani ong∙a jeon a∙dokni pilak biaprango dingtangani aro apsan bewalo tang∙doaniko ra∙bana amgipa chol ong∙gen. Ia dabianiko skanggipa 1972 bilsion dakangaha, jekon bilsi 51 ong∙pilomangba da∙onan chu∙sokatna man∙kujaenga ine ACHIK agandapangaha.
Minggipin Passah ni janapanggiminara, Garo Hills ko bilsi gimiko namdapatna tangka paisarangko bang∙bate chamatronga ingipa kattana ACHIK dolrang uko Garo Hills ona re∙bae Shillong aro Tura ni dingtangrikaniko tosusae niechina jakbikpile aganatskaaha. Ia 2022-2023 bilsina budget session o tangka paisa chamataniko nigenchimode Shillong Smart City project-na gong 700 crore oni gong 1000 crore ona bariataha jeon Tura Smart City na gong 50 crore ko mangmangsan chamataha. Iani bidingo A∙chikrang maming ku∙rang on∙ani aro maming mikbuaniko mesokjaha ineba ACHIK dol aganangaha. Shillongo namgipa nokrango dongchake Garo Hills ni obostako ma∙sigija maming sakki aro pangchakani gri tangka paisarangko bang∙bate chamatenga ine chanchichipe agana skang re∙bae kakket obosta ko niechina ineba ACHIK dol aganataha.
Kakketko sandie nigenchim ong∙ode ia bang∙begipa chamatanirangko badia biaprangona sokatenga uko u∙inagita man∙gen ine uamang agandapangaha.
