Health Minister Ampareen Lyngdoh ni Tura-ko Winter Capital songna dabianiko jechakaniara ra∙chakna amgijagipa aro aiao inmanpilgipa katta ong∙a ine ACHIK ni dilgiparang agananga. Ua saksa niksenggipa aro chugipa dilgipa ong∙e indakgipa jegalaniko dakaniara an∙ching a∙dokni a∙bachengdilgipa dilgiparangni niksamsoe kam ka∙na ka∙kimchaaniko chonikasa ong∙aia.
Tura ko Winter Capital songna miksonganiara Tura songjinmani mingsa nangnikbatsrangipa dabiani ong∙a jean a∙dokni jakgitel ong∙ani somoion janapgimin katta donga. Ampareen Lyngdoh ni ia dabianiko jegalaniara A∙chik a∙songni namroro silroroani aro tang∙doaniko nangnikgijaniko mesokagitaba ong∙a. Winter Capital na chanchisamsoaniara mijalni dabigipa katta ong∙ja. Sorkarini sason ka∙ani a∙damrangko songnagita a∙dokni dingtang dingtang biaprangko tang∙doatna aro cholrangko apsan dake sualna miksongani dongesa a∙dokni a∙bachengdilgipa dilgiparang iako ra∙gatna chanchiangani donga ine an∙ching pilakan u∙iaha. Tura-o ia dabianiko chu∙sokatna sikgijani ja∙pangara dingtanganiko apsangrik dake suale on∙a sikgijako mesoka ine ACHIK Council of Elders ni dilgipa Laben Ch. Marak agandapanga.
Tura-ko a∙dokni skotong songjinma baksa tosusaaniko dakgenchimode name mancha ja∙manchakaniko nikna gita man∙a. Winter Capital ko songe on∙anichi bang∙a rika cho∙ani aro bading chiwalani kamrangoba mikkangchi namdapaniko ra∙bana bil amgipa ong∙a. Unbaksana India a∙songo Winter Capital ko songna chanchianiara ong∙ronggijagipa mamila ong∙ja maina adita a∙dokrangba skotong damgni gnang.
Sorkarini a∙dok skotongona nangchongmotgipa project rangko pangnan bang∙bate chamrongani a∙selo gipin a∙jarangona chu∙ongagita rika cho∙ani kamrangko sokatna man∙rongja. Ian sorkarina mikratani kattaba ong∙na nanga aro mikkangchi a∙dokni gipin biaprangona apsan dake dingtanganirangko sokatna ja∙ku dejagenchimode manderangni ka∙donganiko gimaataona sokatgen ine ACHIK dolrang agananga.
