Tura-ko Winter Capital songna 1972 bilsio Meghalaya a∙dok man∙chengaoni ku∙rachakagita chu∙sokate on∙china SGH Gasuapara jolni Association for Democracy and Empowerment (ADE) dolrang Chief Minister Conrad Sangma-ko didiangaha. Winter capital ko ra∙baanichi Mini-Secretariat-koba posaie on∙a nanga jedakode Garo Hills ko tang∙doatna aro songdongenggipa manderangna dingtanganiko ra∙bana amgen ine ADE dol janapangaha.
Tura songjinmao dingtang dingtang dolrangni ru∙utbea bilsirangoni man∙a nanggni kamrangna gapatna dabienggipakoba ADE dolrang niatpachina a∙dokni skotong dilgipako mol∙molangaha. ACHIK dolrangni dabiani da∙o antisa gapaha ine janapenba Chief Minister Sangma-ko uamang baksa golporime dabianiko ra∙chakna nanga ine didianikoba on∙angjolaha.
