Meghalaya Board of School Education (MBOSE) ni porikkao chubatgipa gadango pass ka∙giparangna, Meghalaya Education Symposium-ko Shillong-o ong∙ate mande ra∙aniko aro mittelpilskaaniko dakna program ko ong∙atangaha. Chu∙sokgipa chatro chatrirangna gisik ra∙ani chin gita momento ba boksisrangko Chief Minister Conrad Sangma aro Education Minister Rakkam Sangma on∙pilskaanirangko dakangaha.
Ia programko lekka-pora aro bidako skie ra∙anio nambate skie ra∙na skul nokrangko, poraichakram biap, asongchakram aro skulo dingtang dingtang nanganirangko namdapatna miksonge ong∙atangaha. Ia programo Agriculture Minister Ampareen Lyngdoh, Arts & Culture ni Minister Paul Lyngdoh, Education ni Commissioner Secretary Pravin Bakshi aro skul college-rangni dal∙dalgipa manderang bakko ra∙angaha.
A∙doko bidako tang∙doatna aro nambatatna re∙mikangengon gital University aro college rangko rike on∙a nangan baksana gitcham skul nokrangko taridape on∙a nanganirang bang∙en donga. Mikkangchi chadamberangni a∙songko dilanina re∙mikkanganio, sorkarini gita chinga man∙a dipet ia pilak dakna nanggni kamrangko ta∙raken chu∙sokatna kamko ka∙enga ine Education Minister Rakkam Sangma aganangaha.
Unbaksana, a∙doko seng∙gipa sapgipa chadamberang bang∙en donga aro uamang sakantian janggi tanganio poraiani gadangosan ong∙aigija a∙dokni silroro namroroanioba nambatako man∙a kragiparang ong∙a. Chadamberangni janggi tanganiko ra∙dona Youth Policy-ko ra∙gate on∙angaha. Chatro chatrirangna nambata skie ra∙chakram biapko on∙a man∙a gita, ge 2000 mang Lower aro Upper Primary skul nokrangko taridapanio bimchipe dakchake on∙enga ine Chief Minister Conrad Sangma agandapangaha. Lekka-porako tang∙doatna dam 39 Eklavya Model Residential School (ERMS) rangko gong 920 crore ko jakkale rikanirangko dakenga ineba Chief Minister agandapangaha.
