Meghalaya a·dokni Adhoc skulo skigiparang Federation of All School Teachers of Meghalaya (FASTOM)-ni ning·o apsan bakrime da·aloni Shillong songjinmao jingjengatna a·bachengataha.
A·dok gimikni ritcha-ni ritcha skigiparang Malki point-oni re·jomanganiko dakangtokaha. Uamang Horse shoe building, Lower Lachumeire oni Barik point-ona re·ange bon·kame Malki-ni kal·chakram biapo tom·dakange a·songe jingjengataniko dakangaha.
FASTOM-ni mongsongbatgipa dabianirangara pilak Adhoc skulrangko aro skigiparangko Deficit ona tang·doate on·china, bilsiprako 5% increment-ko on·china aro retire ong·ani bilsiko 60 oni 65 ona tang·doatchina ong·a. Da·o dipet Adhoc skul-o skigiparangna dormaha on·aniara Lower primary na gong 18,000, Upper primary na gong 22,000, secondary na gong 28,000, science na gong 31,000 aro higher secondary na gong 33,000 mangnigita gamenga jean Deficit na bate name mancha komibataniko nikna man·enga ine uamang janapataha.
A·dok sorkarini maming ja·ku de·jani a·selo uamang indake jingjengatna nangaona sokaha ine FASTOM-ni Vice President S. Jungai tom·anio aganangan baksana uamang Deficit-o skigiparang gitan apsan pora skiani gadang donggenchimoba dormaharangko komibate cha·enga jean apsangrik ong·jaenga ineba aganangaha. Unbaksana bilsi 30 na kingking skigipani kamko ka·giparangba kamna gital rimnapa man·giparangni cha·gipa dormahakon apsan daken man·kuenga ine Jungai parakataha.
