Ru·utgija somoirangna skang cabinet-ni biaprangko dingtangataniko dakani ja·mano Hynniewtrep Integrated Territorial Organisation (HITO) dol Chief Minister Conrad Sangma-ko Khasi-Jaintia jolni dilgiparangna CM-ni biapko wate on·skachina didiatskaaha.
Cabinet-ni biaprangko dingtangataniara apsangrikgipa aro mikkang niteani donggijagipa ong·na nanga. Chief Minister-ni biapna gitcham dilgiparang jekai Deputy CM Sniawbhalang Dhar aro Prestone Tynsong, unbaksa UDP president Metbah Lyngdoh-na on·skachina uamang janapataha. Iako dakanichi kamrangko apsan sualanio ka·donganikosan on·aigija sianggipa dilgipa aro uni pagipa Purno Sangma-ni ramako ja·rikaniba ong·gen ine HITO President Donbok Dkhar chitti seatgipao janapataha.
1988 bilsio P. A Sangma-ni Chief Minister-ni biapko Brington Buhai Lyngdoh baksa bilsi atagriko apsan sualaniko dake dingtangataniko uamang janapate CM-ni biapko Khasi aro Jaintia-ni dilgiparangna on·skaode manderangna gisik ra·na kragipa ong·gen ine u·iatangaha. Unbaksana, kamrangko apsangrik sualna miksonganio cabinet-ko dingtangataha ong·ode CM-ni biapkoba dingtangatna nangjama ine HITO sing·doataha.
MDA-ni gnigipa changna sorkariko rikanio bilsi gni atamang ong·o cabinet-ko dingtangataniara 2023 bilsioni kamrangko apsan sualna ma·sichakgrike chanchigimin ong·a ine Conrad Sangma parakataha. Indake ong·enchimoba Meghalaya ge·sa ma·gipachiko ma·chong songrikgipa a·dok ong·genchimoba Dr. Ampareen Lyngdoh-ko cabinet-oni ra·ongkatani ja·mano me·chikrang saksaba dongjaha aro ian aiao inmanani ong·a ine HITO aganangaha.
Una agreba, dal·dalgipa gadangrang jekai Chief Minister, Leader of Opposition, Speaker aro Deputy Speaker-ni biaprango Garo jatraraoni kam ka·enganikoba HITO janapataha. Ian Garorangni bil gnanganiko mesoka indioba Khasi-Jaintia jatnaba apsangrik sualna nanga ine HITO aganangaha. Uni gimin Chief Minister Conrad Sangma-ko CM-ni biaponi kam ka·aniko dingtangatani bidingo chanchitaichina HITO didiataha.
