Tura Christian College (TCC)-ni chang 8-gipa Foundation Day-ko mijal salni bako Christian Girls Higher Secondary School ni Chapel o maniangaha.
Ia manianiona Meghalaya Legislative Assembly-ni Opposition Leader Dr. Mukul M. Sangma aro Captain Williamson Sangma State University-ni Registrar Ambrose Ch. Marak mongsonggipa sokgipa ong·e bakko ra·angaha.
Uamangna agreba ia tom·anio, adita dingtang dingtang niksenggipa manderang, songsalko dilgiparang, NGO-ni dilgiparang, mondolini dilgiparang, Tura-o donggipa college-rangni skotong dilgiparang aro Rongbakgre-ni Nokma ba dongpae bakko ra·angaha.
Tom·ani bako TCC-ni Vice President Beryl B. Sangma, Tura Christian Academy (Higher Secondary Section)-ko 2010 bilsio a·bachengataoni da·alona kingking chalaibaani gimin talate on·angaha. Indake, Baptist giljani dilgiparangni lekka porachi bidako on·a on·gilpaani gimin aro mikkangchi maikai Christian toromo pangchake bida-ko pakwatna on·a miksonganikoba ua aganangaha.
Ia maniaona sokbagipa Ambrose Ch. Marak, TCC-ko a·bachengate on·giparang, dangdike on·giparang aro faculty memberrangni batanggimin bilsi 8 na uamangni on·kanganina namgipa skaniko on·an baksana mandeskana ka·sagrike saksa sakgipinrangna dangdike on·chinaba didiangaha. Unbaksana Dr. Mukul Sangma ko Tura Christian College ni chu·sokanio mongsonggipa jak donganina aro uni niksamsoe aro dangdike on·anganina mittelpilangskaangaha.
Tom·aniona mongsonggipa ong·e sokbagipa Dr. Mukul M Sangma somoio ko ra·e aganengon, skigiparangko ‘Blacksmiths’ ba silkamal baksa tosusae, uamang chatro chatrirangni taningrangko matsramatgipa ong·a ine aganan baksana bi·sarangna gitalgipa cholrangko ra·na on·anio niam tarigiparang, ma·a parangni aro songsalni manderang apsan meli-nangrime daitoko ra·na nanganikoba Sangma aganangaha. Una agreba da·oni chasongrang dingtanggrikbaani gimin a·gilsak baksa susagrikna nanganina pora skiani gadangrangko namdapatna nanganikoba janapangaha.
Ia manianio, dingtang mancha skigiparangoni bimchipe dangdike on·ahanina mande ra·pilskaani gita Baldhora M. Sangma aro Sungjungmenla M. Sangma-na Best Teacher Award ba boksiskoba on·angaha.
