MDA-II sorkarini Cabinet ko dingtangatanio Dalu-ni MLA Brening A Sangma ko dingtang mancha Minister ni kamna seokanina National People’s Party Dalu Block Committee Chief Minister Conrad Sangma ko mittelpilangskaaha.
Dalu constituency-o 1993 oni 1998 bilsiona (L) Archibold A Sangma ni ja·mano darangba Cabinet Minister-ni kamko ka·angna cholko man·jahachim indiba da·alo Brening A Sangma-ko Cabinet-ni bako ong·ataniara dingtang mancha Dalu-ni NPP Party-o donge kam ka·giparangna aro Dalu-o songdongenggipa sakanti manderangna katchabeani ong·a aro wilwilao namdapataniko man·a ka·dongsoanikoba on·a ine uamang janapataha.
Brening A Sangma dingtang mancha Border Area Development department, Excise department aro Home (Civil Defence and Home Guards) department rangko jako ra·e kam ka·anggen.
