Assam a∙dokni saksa mingsing minggamgipa git ringgipa Zubeen Garg da∙al salo Singapore a∙songo Scuba Diving ka∙mitingo a∙sel ong∙e bilsi 52 ong∙ao a∙gilsakko wate re∙angaha.
Zubeen Garg, Singapore a∙songona North East Festival-o bak ra∙nagita songreangaha jeon ua Scuba Diving ba chi ning∙o napmitingo rasong gribee ong∙nanggija a∙selko chagrongaha. Koborko man∙anigitade, Singapore police dol uko a∙sel ong∙a bikan hospital-ona ra∙angaha ine parakataha. Zubeen-ko ICU-o done nirok simsakaniko dake sanne nigenchimoba saknaa bilongbeani gimin jokatna man∙jaha aro ua hospital-on janggi galaha ine parakataha.
Ua saksa Assam a∙dokosan ong∙aigija India a∙songoba namen mingsing minggamako man∙gipa git ringgipa ong∙a. Bollywood-o ua mingsinggipa aro manderangni namnikbegipa gitrang jekai Ya Ali, Dil Tu Hi Bataa, Socha Nahin Tha, Dard-E-Dil, Jeena Kya Tere Bina aro gipin gitrangko ringangaha. Uni rang∙gittik a∙gilsakko wate re∙anganiara Assam a∙dokna aro India a∙songna namen gimaani ong∙aha.
