University of Science and Technology, Meghalaya (USTM)-ni forest a∙arangko sinchepanina aro niamni a∙palo rika cho∙anirangko dakani bidingo Supreme Court-ni Central Empowered Committee (CEC) matnangate gong 150 crore tangkarangko dai gamchina ge∙etangaha.
Committee-ni agananigitade, ma∙mong sorkarini maming ra∙chaka gri forest a∙a-ni 25-hectare mangni biaprangko Ribhoi a∙jao donggipa USTM niamni a∙palo a∙kangaha jeonin 13.62-hectare rango rika cho∙anirangko dakangaha ine parakataha. USTM-ni dai gamna nanggipa tangka paisarangko jakkale bilsisa ni gisepo je forest ni a∙arango rika cho∙anggiparangko ra∙gale buring bolgrim-ni ong∙telaigipa bewalona ra∙bapiltaichinaba panel ge∙etangaha.
Una agreba P.A. Sangma Memorial Medical College ko rikanio forest a∙ani 7.64-hectare mangnigita biaprangko nosto ka∙angaha ine report-o janapangaha. Indake rika cho∙anirangko dakani a∙selo buring bolgrim rangko bang∙en nosto ka∙aniko nikangna man∙angaha ineba CEC parakataha.
2017 bilsio Union Environment Ministry ni USTM-ni a∙arang forest-ni ning∙o ga∙aka ine sakki on∙genchimoba Forest Conservation Act, 1980 ni ning∙o nanggipa clearance ba hukum on∙aniko dakangjaha ine u∙iatangaha. Apsan daken, 2021 bilsio State Forest department-nigita Medical college na a∙a on∙agipa-ara Meghalaya Forest Regulation, 1973 ko pe∙ani ong∙a ine janapangaha. USTM-ko mangmang janapaigija, Ri-Bhoi a∙jao niamgri ro∙ong bikotaniko, koela cho∙ani aro ro∙ongrangko bretatnikoba dontongchina ge∙etangaha.
Ian Meghalaya a∙dokni sima ari jolrango buring bolgrimrangko nosto ka∙e Assam-na mongsongbate Guwahati songjinmana neng∙nikarangniko ra∙baanio pangchake ia report ko on∙angaha. Batanggimin 2023 bilsio Assam-ni Chief Minister Himanta Biswa Sarma USTM-ko “flood jihad” ine agansolangaha jekon Meghalaya-Assam ni sima ari jolrango bol den∙ani gimin aro a∙brirangko ratani a∙selo chi bana ong∙ronga ine ua matangataha.
