Guwahati songjinmani ge∙sa Private University-o poraienggipa sak 5 chatro-rang me∙chik saksako drae til∙ekangaha ine u∙ina man∙aha. Kobor rangko man∙soanigitade, til∙eka man∙gipa me∙chik ba ua sak 5 me∙asarang baksa apsan University-o poraigipa ong∙a ine u∙ina man∙aha aro da∙o dipet til∙ekanio jako donggipa sakgni chatrorangkosan Police dolrang rim∙na man∙kuenga ine parakataha.
Name dake am∙sandiani ja∙mano, uamang apsan rorimangaha aro ua me∙chikna pekatgipa bosturangko on∙chengesa til∙ekangaha ine u∙ina man∙angaha. Til∙ekanio bak donggipa me∙asarang Manipur-oni ong∙a aro ia obostao ga∙akgipa me∙chik-ara Tripura ni ong∙a ineba ma∙sina man∙aha.
Obostao jangnanggipa me∙chik-ni badi ka∙ani ja∙mano, dosi dakgipa me∙asa sakgniko rim∙na man∙genchimoba sakgittam chatrorangko rim∙na man∙kujaenga ineba Police dolrang u∙iatangaha.
Ia obostako knaani ja∙mano, Tripura ni dilgipa Pradyot Kishore Debbarma uamangni indake namgijagipa kamko ra∙ken jegalangaha aro kakketgipa bichalko on∙a ja∙ku de∙anggen ine ua agnangaha. Ia a∙selo ga∙akgipa me∙chik baksa Pradyot Debbarma golpogrikange una dakchakna ku∙rachakangan baksana uni bimungko parakatjachinaba manderangko didiangaha.
