Shillong Nongrah Nonglum songni bilsi 4 ong·gipa me·chik bi·sani siani bidingo am·sandianiko dakani ja·mano noksuloni bilsi 13 ong·gipa me·a bi·sa bak donganiko East Khasi Hills-ni SP Vivek Syiem parakataha. Ia ong·a obostani bidingo September 15 tariko manggisiko man·aoni Special Investigation Team (SIT) bikote am·sandianiko dakaha.
Name sing·sandianirangko dake aro sakkirangko chu·onge man·ani ja·mano police-rang ia me·a bi·sani jak donganiko ma·sina man·aha. Ua noksul kachapgipa aro sianggipa me·chik bi·sani nokona jringnan rona re·ruragipaba ong·a. Me·a bi·sako Child Welfare Committee-ona rimangon ua an·tangni dosko ku·chakaha ine SP Syiem parakangaha.
Me·a bi·sani agananigita a·sel ong·ani salo ua sianggipa me·chik bi·sako uamangni nok pakma kosakgita rimangmitingo obostao ga·akaha ine parakaha. Ua somoio mikkarang namen jimbeani a·sel nokni aro retaining wall-ni gisepgriko chi gapdoaha ine ua aganangaha. Me·a bi·sa uni ja·ao nanggipa a·mangrangko susrange galani somoiosa ja·srote ga·akangmitingo me·chik bi·sako rim·chapange sakgnian apsan ga·akangaha. Me·chik bi·sa pakma gisepgriko ga·ake chi sripe siaona sokaha aro me·a bi·sa ja·ao adita saknaa man·aha ine talatangaha.
Indakgipa a·selo chagronge aro kenjagoke me·a bi·sa noktangchi re·pilna skang me·chik bi·sani manggisio ro·ongko gatjete donangaha. Jensalo me·chik bi·sako nokdang aro noksulrang am·sandinagita re·baon ua me·a bi·sa ma·gipa baksa re·chapbaaha ine Syiem aganaha.
Una agreba darangba uko u·ijanagita Scorpio gari gisimo ku·sik katipgipa manderangko nika ine golpo tarie an·tangko naljokatna jotton ka·anikoba me·a bi·sa ku·chakaha. Manggisiko post mortem ka·anioba maming saknaani, til·ekani chinrangko man·jaha aro chio sripe sianiko name u·ina man·angaha. Pulis dolrangni am·sandianio, ua me·chik bi·sako je biaponiko man·aha ua biapon sikamaha ineba uamang talatangaha.
