Da∙al salni bako West Garo Hills, Tura, District Maternity & Child Hospital-o Swasth Nari Shashakt Parivar Abhiyaan-ning∙o me∙chikrangko ra∙dona aro nokdangko bilakdapatna oprake on∙angaha.
Ia tom∙aniona West Garo Hills a∙jani District Medical & Health Officer (DM&HO) Dr. Jakrambal A. Sangma, District Maternal & Child Health Officer (DMCHO) Dr. Ivonne M. Sangma, District Maternity & Child Hospital ni Medical Superintendent Dr. Bollen S. Sangma, gipin doctor aro official rang baksana sepang joloni adita manderangba re∙bae bakko ra∙angaha.
Tom∙anio somoiko ra∙e aganengon Dr. Ivonne Sangma, Prime Minister-ni miksonganiko janapange Ministry of Health and Family Welfare ni dilanio ia Swasth Nari Shashakt Parivar Abhiyaan ko a∙bachengate on∙a man∙anina uni katchaaniko parakangaha. Swasth Nari Shashakt Parivar Abhiyaan da∙aloni October 2 tarikona a∙jao aro songsalo dongenggipa me∙tra me∙chikma rangna be∙enigita an∙sengbaljoke dongna dakchakan baksana nokdangko bilakdapatna dakchakanggen ine Dr. Sangma aganangaha.
Swasth Nari Shashakt Parivar Abhiyaan ni gita me∙chikrangna adita dingtang dingtang sanna bannanirangko jekai anaemia, tuberculosis, bigilni sabisirang aro an∙o dongmitingo saanirangko indin porikka ra∙na cholko on∙anggen ine Dr. Sangma aganangaha. Uasan ong∙aigija immunisation drive ba biji suanirangko ong∙atan baksana, cha∙a ringani bidingoba aganskie on∙anggen ineba Dr. Sangma agandapangaha.
Una agreba ia campaign-o pangchake songsalo dongenggipa sakantikon an∙sengbaljoke janggi tangna didiangan baksana malnutrition ba cha∙a ringanio chu∙onggijania bidingoba skie on∙anggen ine u∙iatangaha. Apsan dake blood donation camp-rangko, Ayushman Bharat aro Megha Health Insurance Scheme (MHIS) ni ning∙o bimung segatanirangkoba dakangna miksonganiko talatdapangaha.
Sanna bannani a∙bao an∙tangtangko mikkango done kam ka∙gipa sakanti health care worker, Anganwadi worker, doctor, nurse aro Village Health Council member rang baksana civil society ni dilgiparangkoba Dr. Ivonne Sangma mittelpilangskaaha. Tom∙bimongani bon∙kamgipa bako adita dingtang dingtang bakrangna kam ka∙e on∙angaha jekai MHIS-o bimung segatani, Blood Donation Camp, Cancer-na porikka ra∙ani, TB, OPD, ENT aro mikron-ni ning∙o sabisi donggiparangna sannanirangkoba dakangjolangaha.
