September 16 tariko sak 8 gitalgipa Minister rangni Raj Bhavan-o ku·mikchetani ja·mano, Meghalaya-ni Chief Minister Conrad Sangma Budbar salo uamangna dingtang dingtang portfolio rangko chamataha.
Ia sak 8 Minister rangara, NPP doloni Timothy D Shira, Wailadmiki Shylla, Sostheness Sohtun aro Brening A Sangma ong∙a. UDP doloni Metbah Lyngdoh aro Lahkmen Rymbui, BJP dolni Sanbor Shullai aro HSPDP dolni Methodius Dkhar ong·a.
Chief Minister Conrad Sangma, sakgni Deputy Chief Minister Prestone Tynsong aro Sniawbhalang Dhar aro Cabinet Minister Marcuise Marak na batanggimin somoio donanggimin portfolio rangkon jako ra·e kam ka·angkugen.
Chief Minister Conrad Sangma, Cabinet Affairs, Finance Department aro gipin Minister rangna tikatgijagipa department rangko jako ra·anggen.
Tynsong apsan daken Home (Police), Public Works Department (Roads & Buildings), District Council Affairs aro Parliamentary affairs department ko nirokanggen aro Urban Affairs department, Transport department, Commerce & Industries department aro department of Prisons and Correctional Services ko Dhar jako ra·angkuenga. Soil & Water Conservation department, Public Health Engineering (PHE) aro Housing department ko Cabinet Minister Marcuise N Marak nirokangkugen.
Power department, Water Resource department, Taxation department, aro Textile department ko Metbah Lyngdoh na chamataha aro Lahkmen Rymbui Education department, Revenue and Disaster Management department, Information and Public Relations department aro Law department rangko jako ra·angskaenga.
Tourism department, Agriculture department aro Fisheries department ko Timothy D Shira jako ra·angenga. Border Area Development department, Excise department aro Home (Civil Defence and Home Guards) department rangko Brening A Sangma nirokangskaenga.
Sosthenes Sohtun na Community & Rural Development department (C&RD), Secretariat Administration Department aro General Administration Department ko chamataha aro Wailadmiki Shylla Health & Family Welfare department, Sports & Youth Affairs aro Home (Passport) department rangko jako ra·angskagen.
Animal Husbandry & Veterinary department, Arts & Culture department, Printing and Stationery department aro Legal Metrology department ko Sanbor Shullai na chamatangaha. Bon·kame, Food Civil Supplies & Consumer Affairs Department, Labour Employment & Skill Department, Registration & Stamps department aro Cooperation department rangko Methodius Dkhar na chamatangskaaha.
