Gitcham cabinet minister-rang chong·motan Paul Lyngdoh aro Krymen Shylla-ko ra·galani bidingo United Democratic Party (UDP)-ni dilgipa Metbah Lyngdoh talatengon ian party-ni MLA-rangni gisepo kamrangko ka·ani daitoko sualgrike ka·na re·mikkanganisan ong·a ine aganangaha.
Chinga ge·sa party ong·e mikkangchina aro Chief Minister Conrad Sangma baksa dontonggija bakrimaniko on·angkuna re·mikkangenga ine Lyngdoh gitalgipa cabinet-ni biapo ra·napako man·e ku·mikchetani ja·mano aganangaha. Uamangni dolo da·o sak 60 assembly member-rangoni sak 12 mang MLA-rang gnang.
UDP-ni sakgni minister-rangko cabinet-oniko ra·galani ja·pangko sing·aniko dakon uamangko ra·galanio dingtang mancha maming miksonganirang dongja indioba ian uni nikanio namgipa ja·ku ga·ani ong·a jekon sakanti seoka man·gipa MLA-rang aro party-ni chu·gimik namnikaosa dakaha ine Lyngdoh aganangskaaha.
Gitalgipa cabinet minister-rangni ku·mikchetani salo Paul Lyngdoh-ni dongjanina sing·aniko dakanina aganchakengon da·al salo Paul Lyngdoh-ni bon·kamgipa cabinet minister-ni sal ong·ani gimin ua nangchongmotgipa kamrangni matchotatna nangani a·selo bakko ra·nagita man·jaha ine Lyngdoh talatangaha.
