MDA 2.0 ni cabinet biaprangko dingtangatani ja·mano Chief Minister Conrad Sangma talatengon Marcuise N. Marak-ko party-ni gitchamgipa dilgipa aro NPP dolni a·bachengaonin on·kange kam ka·gipa ong·ani gimin donangkuna tik ka·aniko parakangaha. Marak NPP dolni Working President-ba ong·a aro NPP dolni ong·katkujaonin ua ru·utbea somoirangoni NCP dolo ong·aonin dontonggija kam ka·baenga ine Sangma aganangaha.
Iarang pilakko nigrike Marak-ko cabinet minister-oniko ra·galgija donangkuna nangnikaniko Chief Minister mijal attamo parakangaha.
NPP-ni gipin dilgiparang chong·motan AT Mondal aro Ampareen Lyngdoh-ko ra·galani bidingo aganengon, Non-Tribal jatnaba aro me·chikrangni gisepoba ia bilsi gni atana biaprangko on·angaha ine parakangaha. Uamang gipin gitchamgipa dilgiparangna wate on·skana nanga jemangan NPP dol baksa ru·utbea somoionin apsan kam ka·baenga ine Sangma talatangaha.
Ia dingtangataniko MDA sorkario bakrimgipa dolrangna aro sakanti dilgiparangna apsangrik cholko on·a miksongani gnang dakaha ine Sangma agandapangaha.
