Uttarakhand, Dehradun-o Sombar salo bilongbee mikka jimbee waani a∙selo adita biaprango chi bana ong∙aniko, a∙a ruronganiko aro chirang skonge donganiko nikna man∙aha. Dehradun, Tehri Garhwal aro gipin nangchakgipa biaprango manderangko simsake dongchina Indian Meteorological Department (IMD) red alert-na mikrakataniko on∙ataha
Da∙o dipet Dehradun a∙jao mikka jimbee waanichi gamchatgipa ramarang, dolongrang, nok jamrang aro dokan nokrang namen nisiatako man∙angaha. Una agreba ta∙rakbegipa chirang a∙brirangoni joksuakbaani a∙selo adita sak manderangko man∙pakangaha aro gimaanikoba koborrangko man∙soaha.
Sahastradhara, Maldevta, Tapkeshwar Mahadev Temple, DIT College jol aro Bhagat Singh Colony nisiata man∙batgipa biaprang ong∙a. Manderangko jachange donggipa biaprangoniko naljokatnagita National Disaster Response Force (NDRF), State Disaster Response Force (SDRF) aro PWD department-ni dolrang dakchakaniko on∙a raken kamko ka∙enga.
