Meghalaya-ni changbri mang Chief Minister ong∙anggipa Pa Donwa Dethwelson Lapang re∙anggipa September 12 tariko a∙gilsakko bilsi 91-o wate re∙anganina Sonibar saloni da∙al Sombar sal September 15 tarikona salgittamna kal∙imaniko dakangna a∙dok sorkari parakataha. Da∙alo uko bon∙kame mande ra∙angnagita Shillong songjinmani Students’ Field Jaiaw-o janggini tom∙tomanina bon∙chote gilja ra∙e bichakaniko dake uni manggisiko Jaiaw Presbyterian gopramo gopaniko dakangaha.
Uni manggisiko gopanio aro uko bon∙kame mande ra∙aniko dakanio a∙dokni Chief Minister Conrad K Sangma, Deputy Chief Minister Prestone Tynsong aro Sniabhalang Dhar, Opposition-ni dilgipa Dr. Mukul Sangma aro dingtang dingtang party-ni bang∙a dilgiparang re∙ange bakko ra∙angtokaha.
Meghalaya a·dokna bang·a namdapaniko ra·bana aro mongsongbate Ri-Bhoi a·jako bimang ong·atna Lapang dingtang mancha bimchipe kam ka·angaha ine Chief Minister Conrad Sangma uko de·doe aganangaha. Unbaksana ua saksa pagipagita NPP ni Chief Advisor ong·e 2018 bilsioni kam ka·anichi uamangni sorkariko chalaianio uni namgipa ku·pattianirangkoba on·angaha ineba parakataha.
DD Lapang ine mingsing minggamako man∙gipa 1934 bilsini April 10 tariko atchiaha aro ua September 12 tarik 2025-ni wal 10:45 mang bajio adita be∙ennigita bilsi re∙ange biljrimaniko man∙e Bethany Hospitalo sanna bannaniko ra∙engmitingo a∙gilsakko wate re∙angaha.
Lapang, 1972 bilsio Nongpoh constituency-o MLA na Independent ong∙e susae skanggipa changna cheangaha. Uni ja∙mano ua 1992 bilsini February 5 tarikoni 1993 bilsini February 19 tarikona skanggipa changna Meghalaya a∙dokni Chief Minister ong∙angaha. 2003 bilsini March 4 tariko, ua gnigipa changna Chief Minister na seokaniko man∙angtaie 2006 June 15 tariko coalition rikgipa dolrangni meligrikani a∙sel ua CM ni chokkioni kamko watangna nangaha. 2007 bilsini March 10 tarikoni 2008 bilsini March 19 tarikona gittamgipa changna Chief Minister ni kamko jako ra∙angtaiaha. Bon∙kame ua brigipa changna Chief Minister-ni kamko 2009 bilsini May 13 tarikoni 2010 bilsini April 19 tarikona ka∙angaha. Meghalaya a∙doko DD Lapang na agre darang dilgiparangba changbrina kingking Chief Minister ong∙e kamko ka∙anggipa dongkuja.
