A∙dokni BJP-ni dilgiparang party ni sakgni MLA rang chong∙motan AL Hek aro Sanbor Shullai ni gisepo Cabinet suakgrikna songgigrikani bidingo mamingkoba u∙ija ine Robibar salo parakataha. Uamangni 2023 bilsini March 6 tariko ku∙mikchetaonin indakgipa songgigrikanirang donganikoba u∙irikja maina iani bidingo maming dakeba lekkao seanirangba dongja ineba aganangaha.
Iani bidingo party-ni je dakgipa rai on∙aniko ua ra∙chakaigen ine batanggimin sal somoirango Hek aganangan baksana Shullai aro uni gisepo Cabinet sualgrikna songgigrikani dongama donggijaniko sing∙aniko dakon, ua aganchakna jechakangaha.
Ian Chief Minister-ni cabinet o dingtangatna miksongani kobor-rang giproroani gisepo AL Hek ni palo Sanbor Shullai na Minister-ni kamrangko pakwatangskaani kattarangba dongangaha.
