Ru∙utgija somoirang skang India a∙songo tax ra∙aniko dingtanganiko Chief Minister Conrad Sangma demittele aganangenba nanggipa bosturangni damrang komigenok ine parakangaha. Ia ja∙kuko de∙anichi gital damrangko tik ka∙ani ning∙o nokdangrangna korosrangko komiatna aro tangka paisarangko chimonge donanirango namdapatna man∙anggen ine Sangma parakangaha.
56th GST Council-o ma∙mongni Finance Minister Nirmala Sitharaman-ni dilanichi 12% aro 25% ko komiate uni palo 5% aro 12% damko ra∙skachina tik ka∙aniko Sangma talataha. Unikoa, sin goods chong∙motan biri, cigarette, ringani bostu, pan masala, sada aro apsandakgiparang; luxury goods jekai gari gora, silchidare aro gipin bosturangna 40% mang bariatskaaha ine Sangma parakangaha.
Ia gitalgipa damrangko 2025 bilsini September 22 tariko ra∙gatnasienganiko Sangma janapange Prime Minister, Finance Minister aro GST Council member-rangko ua demittele aganangaha. Ian chonchongipa bading chiwalgiparangna aro business ka∙e cha∙enggiparangna namgniko on∙anggen unbaksana a∙songo karkanarangko chalaigiparangna saksa sakgipin baksa susagrikanichi man∙dapaniko on∙angskagen ine Sangma aganangaha.
Gitalgipa GST ra∙aniko dingtangatani bidingo assembly-o Sangma mijal salo janapengon ian songdonggipa manderangni janggi tanganiko namdapatna dakchakanggen aro bading chiwalgiparangba an∙tangtangni nangnikagita dake cha∙na man∙gen ineba aganangaha.
