Manipur a·doko 2023 bilsini May jaoni so·sojengjeng ong·na a·bachengaoni da·alo skanggipa changna Prime Minister Narendra Modi a·dokona re·bae mikkang pa·angaha. Uni Manipur a·dokona re·baanio adita project rangko oprake on·angan baksana gong 71,000 crore mangni project rangna pangchakani ro·ongrangko songeba on·angjolgen. Uko Imphal airport-o Governor Ajay Kumar Bhalla aro Chief Secretary Puneet Kumar Goel dingtang mancha rimchaksoaniko dakangaha.
Northeast aro India a·songni salaram jolrangona re·bae nirokaniko dakna salgittamna somoirangko ra·angenga, jeon ua Mizoram a·dokna Indian Railway-ni skanggipa Bairabi–Sairang rel garini ramako da·al pringo oprake on·angaha.
Modi dingtang mancha Kuki jatrangni a·ja Churachandpur aro skotong songjinma Imphal-ona re·ange adita tom·anirangko dakanggen. Manipur-o Meitei aro Kuki jatrangni gisepo kajia golmal ong·anio sak 260 manderangna batpile janggiko gimaatangaha aro sak 60,000 manderangnigita nokjamrangko wate katbana nangao ga·akaha. Ia so·sojengjeng ong·aniko a·dok sorkari namatna man·jani gisepo ia bilsini February jaonin President rule ni ning·o ong·enga.
Ua internally displaced persons (IDPs) ba nokjamrangko wate katbagipa nokdangrang baksa agan golpogrikanikoba dakangjolgen. Ia salgittam-ni gisepo Prime Minister Narendra Modi Mizoram, Manipur, Assam, West Bengal aro Bihar a·dokrangona wena manchiangenga.
