South West Garo Hills a∙jao nirok simsaksaniko, rika cho∙aniko namdapatna aro sorkarini manderangna on∙giminrangoniko name jakkalna man∙agita Deputy Commissioner Hema Nayak mijal salo Betasing C&RD block-ni ning∙o ga∙akgipa dingtang dingtang department-rangni kam ka∙aniko re∙ange nirokeaha.
Deputy Commissioner Hema Nayak, Adugre songo donggipa Kasturba Gandhi Balika Vidyalaya (KGVB) skulo napaaha aro chatro chatrirang baksa skia poranio chu∙onggijanirangna dakchakaniko on∙a agan golpogrikangaha. Ua skigiparang baksaba bang∙a nanganirangko ma∙sie ra∙na golporimangaha jeon ua Betasing aro Zikzak Block-ni KGVB skulrangko namdapatna ru∙utgijaan tom∙aniko dakna aganangaha. Nayak, Betasing block office-ni technical official-rangko skulona rama dakanggipa namgijaniko nike MGNREGS-ni ning∙o rama tarinagita cholrangko am∙sandichina ge∙etangaha.
Betasing–Mellim ko tarienggipa ramako Deputy Commissioner nirokaniko dake Dilne chibimani a∙selo a∙arang ruronge nosto ong∙atenganina ta∙rake tarie on∙china aro ru∙siata man∙gipa biaprango naljokaniko on∙e taridapchina PWD (Roads) official-ko ge∙etataha.
Betasing PHC-onaba re∙ange ua Medical Officer aro staff-rang baksa sanna bannanio neng∙nikanirang jekai vaccination drive ba biji su∙ani, bilsi sokgijao an∙o dongani, gisiknigita saanirang, IMR, MMR, OPD aro IPD-ko namdapatani cholrangni bidingo agangolporimaha. Ia somoio official-rang kam ka∙giparangni chu∙onggijani aro internet namgijanichi data-rangko upload ka∙na aro MHIS baksa Aadhaar-ko nangdimatna neng∙nikani bidingo talatangaha. Uamangni janapaniko Nayak nirok simsakatna aganangaha.
Ia somoio ua Malchapara Horti Hub-o napajole Tissue Culture Lab & Training Hall-ko nirokangaha. Ia biapko tariaonin da∙onaba jakkalkujaenganina gipin department-rang ba cooperative-rang baksa a∙damko jakkalna man∙agita MoU-ko soi ka∙e bakrimchina ku∙pattianiko on∙angaha. Rural Infrastructure Development Fund (RIDF)-ni ning∙o rikenggipa polyhouse-rang aro ia biapo gipin rika cho∙ani kamrangkoba Nayak nirokangaha.
Bon∙kamao ua Chengkompara songo Handloom & Textiles department-ni 2015-16 bilsio rikgipa Sale Depot & Textile Gallery-ko nirokeaha. Ia noko da∙onaba jakkalgija donenganina ua suk ong∙jae daito gnanggipa official-rangko iani bidingo chanchirimaniko dakna name che∙eme tarigipa report-ko on∙china mol∙molangaha. Ia biapko dikdiksa somoina office nok chu∙onggijagipa department-rangna jakkalskana man∙gen ine Nayak aganangaha.
