Meghalaya-ni changbri mang Chief Minister ong∙anggipa Pa Donwa Dethwelson Lapang-ni a∙gilsakko wate re∙anganina da∙al saloni a∙bachenge Sombar sal September 15 tarikona chong∙motan salgittamna kal∙imaniko dakna a∙dok sorkari parakataha.
DD Lapang ine mingsing minggamako man∙gipa 1934 bilsini April 10 tariko atchiaha aro ua mijal sal 10:45 mang bajio adita be∙ennigita bilsi re∙ange biljrimaniko man∙e Bethany Hospitalo sanna bannaniko ra∙engmitingo a∙gilsakko wate re∙angaha.
Pa DD Lapang saksa gitchambegipa dilgipa aro brigipa changna Meghalaya-ni Chief Minister ong∙e a∙dokna aro a∙songna on∙kange kamrangko ka∙angaha. Pa DD Lapang-na September 15 tarik Sombar salo Students’ Field Jaiaw-o 1 bajimango janggini tom∙tomanina bon∙chote gilja ra∙e bichakaniko dakgen aro joljol uni manggisiko Jaiaw gopramo gopaniko dakgen.
