Re∙anggipa Budbar salo pringni 3:30 bajimango rubber salangenggipa pick-up gariko Paikan sokna skang Bolsalgrimo ma∙sina man∙gijagipa manderang sekdrae ra∙aha. Rubber salangenggipa manderang Dalu songoni ong∙a aro uamang Assam a∙dokona rubber-rangko salangmitingo ia a∙selko chagrongaha.
Sekdrae ra∙gipa manderang Alto gari bolgnio re∙baaha aro pick-up gariko mikkang ki∙sang changsote chabiko sekdraenba rubber gnang sale ra∙angaha. Ia gari ML 08 J 7509 ko da∙onaba man∙kujaenga. Denggu dakgiparang saksnimang donga aro uamang A∙chikkukon jakkalaha ine parakataha. Chanchichipe agananigitade uamangoni gipin jat baksa A∙chiksakarangba gnang ine janapataha.
Denggu dakgipa manderang rod-rangkoba jakkale doka satanikoba dakaha jeon a∙selko chagronggipa saksako ja∙a be∙tonge dokaha aro sakgipinba aditaan saknaa man∙aha. Unbaksana, iamang sakgnikoba garion gatchape ra∙ange Jugigopa dolong sokna skang galone donangaha ine parakataha. Manderangko ia rama jolrango simsakchinaba uamang mikrakaniko on∙ataha.
