NH51 project-ni ning·o Rongram-Goeragre-Chitoktak ramarangko tarina a·a nokgiparangni aro songni manderangni on·gimin-na batpile niamgri apalbatatanina ASPF-ni General Secretary National Highways and Infrastructure Development Corporation Limited (NHIDCL) Tura-ni Managing Director-na chittiko sedoataha.
Ia ramarangko tarina a·a nokgiparangni biaprangko on·genchimoba soroko tarianio a·arangko on·gimina batpile ta·rienga ine ASPF-ni General Secretary aganangaha.
Ia project-ni ramarangko tarianio a·a nokgiparangna tangka paisarangko gamna nanga gita on·gija komie on·aniko dakan baksana mittam a·a nokgiparangnade on·srangkujaenga ineba aganangaha.
Duragre, Chasingre, Rongkhon aro Chitoktak ramarango retaining wall tarienggiparang matchotgijan on·tisa mikka wajokon begruaniko nikna man·enga aro nalarangko name tarijani a·selo ramarango chi joksuake dongenga ineba ASPF dol aganangaha. Unbaksana culvert-rangkoba tarie on·ja ineba agandapangaha.
NHIDCL-ni contractor-rang sorkarini bosturangko indin jakkaleba songni manderangko onchepe ra·enganiko tarake nirokate tangka paisarangko man·a nanggipa a·a nokgiparangna on·china ASPF-ni General Secretary Bernita Marak mol·molangaha.
Uamangni cho·ani kamrangko ka·anichiba a·arangko ru·rongatenga, bolam biterangko ge·chakgipa biaprangko nosto ka·atenga aro sepangjolo donggipa songrangna adimurangko dilingatenga ine Marak parakataha.
Songsalrango sorkarini dingtanganiko ra·bagipa kamrangko uamang jegalenga ong·ja indioba maming saloba singjetani, mande ra·gijani aro rika cho·anio naljokani donggijagiparang ong·na nangja ine Marak janapataha. Uni gimin manderangni ia janapgimim neng·nikani, nangnikanirang aro uamangni kosako sinjetanirangko dakgija NHIDCL an·tangni daitotangko name ka·china Marak mol·molataha.
