TMC Youth dolni dilgipa Richard Marak, Tura Municipal Board (TMB) aro a∙dok sorkariko Tura super market-ko rongtalatna nama ja∙kurangko de∙e taripiltaie on∙china didiangaha. Tura Super Market-oni moilarang selbae nalarangoni sorokrangona joksolangani a∙sel dokan dakenggiparang aro ramarangko re∙enggiparangna neng∙nikaniko on∙enga. Ia ong∙enga obostako TMB-rang u∙ioba aro official-rangni salanti ramako re∙pake nikeoba uko taripiltaie on∙a maming ja∙kurangko de∙kujaenga ine Richard Marak aganangaha.
Iani bidingo TMB-ni CEO Rikse Marak, contractor-ni kam namjani a∙selsa ia obostarang ong∙enga ine re∙anggipa salrango matnangangskaaha. Indake ong∙genchimode da∙o iako nirok sandie kam ka∙na uamangni daitoan ong∙achim ine Marak aganangaha. Chief Minister Conrad Sangma ni Tura Super Market-ko a∙doko ge∙sa bajar anti nambatgipa ong∙e tarina ku∙mitchetani da∙onaba chu∙sokujaenga ine ua matnanga gnang aganangaha. Ia Supermarket-ko Chief Minister Christmas na skang nambate tarie on∙piltaina ku∙chakaniko, matchotgija tarie donanina Marak uni suk ong∙gijanikoba parakangaha.
Tura Super Market-o dokan dake badingchiwale cha∙enggiparangna aro bree cha∙giparangna neng∙nikaniko ra∙bajana gita rongtal an∙talaniko ta∙raken dakchina mol∙molangaha. Bajar antiko rongtal an∙tale rakkina man∙gijagipa manderangni kosako kraa sastiko on∙a nanga ine Marak aganangaha.
