Da∙al salo Meghalaya Legislative Assembly-ni Autumn Session-ni skanggipa salo a∙songni aro a∙dokni a∙gilsakko wate re∙anggipa dingtang dingtang dilgiparangko minute 2 mangna jrip donge mande ra∙aniko dakangaha.
Chief Minister Conrad Sangma, sianggiparangko janape assembly-o aganengon a∙dokni gitcham Governor Satya Pal Malik-ko gisik ra∙e dingtang mancha janapangaha. Malik bilsi 79 ong∙ao 2025 August 5 tariko a∙gilsakko wate re∙angaha. Malik-kosan ong∙aigija Sangma gipin dilgiparangkoba uamangni mingnamgipa kamrangna a∙dokna aro a∙songna on∙kange dangdikanina demittelangaha.
Leader of Opposition Dr. Mukul Sangma-ba bakko ra∙e aganengon bang∙a sianggipa dilgiparangko janapangaha. Uni agananio ua mongsongbate ia bilsini June 15 tariko bilsi 97 ong∙ao a∙gilsakko wate re∙anggipa Salmanpara-ni gitcham MLA Samarendro Sangma-ko gisik ra∙angaha. Unikoa gipin dilgiparangkoba janapange gitcham Governor Satya Pal Malik-koba demittele aganangaha.
Mairang-ni MLA Metbah Lyngdoh aro Assembly Speaker Thomas Sangma-ba uamangni namgipa kamrangna demittelangan baksa janggini tom∙tomanina aro dongrikenggipa nokdangni manderangna nama skaniko on∙angaha.
