Shillong songjinmao an∙tangtangko dakjee silchi darerangko ra∙bitgipa sak 13 manderangko Secretariat a∙paloniko police dolrang mijal salo rim∙aha. Uamang an∙tangtangko law enforcing agency-ni manderang dake dakjeaha aro adita apsanchrak dake tarigipa silchi darerang jekai ge 5 air gun, ge 2 air pistol, ge 6 magazine, aro ge 5 walkie-talkie rangko ra∙bite songjinmao re∙rame dongaha.
Ia manderangko mijal sal 2:30 mang bajio Shillong Secretariat paksao glass gisimatgipa gari bolgittamoniko chong∙motan Scorpio ML05 AF 0309, gisim rong Toyota Innova T0922 ML7411A aro Audi A4 gitchak rong jean registration ka∙kugijagipa ong∙a. Gari bolsao siren-koba chataha aro iaranga Pohkseh Shillong-ni saksa Mebanshem Snaitang-ni garirang ong∙a ine parakataha.
Ia garirangko nike SOT dolrang bikan biapona sokangaha aro am∙sandie nion chola gisim gangipa sak 12 manderangko nikaha jemang an∙tangtangko Mebanshem Snaitang-ni bodyguard dake dakjeaha. Uamang sak 13-ko Sadar Police thanaona nanggipa sing∙sandianirangko dakna rimangaha, gari aro garioniko man∙gipa bosturangkoba a∙kange donaha.
Ia sak 13 manderangni kosako law enforcing agency dake dakjeanina mokor domakoba ka∙doanggen aro Arms Act-ni ning∙oba dakna nanganirangko dakanggen ine parakataha.
