June jani 7 tariko sorkariko chalaigiparang, 2022 ni May jao reservation roster ni gimin a∙dokni sorkari-ni department aro agency rango kamna ra∙napaniko office memorandum-o ra∙gatangaha.
Chief Minister Conrad Sangma ni u∙iatani gitade taridapgimin office memorandum ko knalo ba knal ni salsao manderangna u∙iatgen aro a∙dokni dingtang dingtang sorkarini department aro agency rangni kamrangna manderangko niamni gita seokanirangko dakangpilgen.
Ia taridapgimin office memorandum-o all parties committee rangni agan-ku∙pattie on∙anikoba ra∙aha ine Conrad Sangma aganangaha.
Kam sandienggipa chadamberangko ia kamrangna seokujani a∙sel neng∙nikaniona sokgen aro nama ong∙ja ine ua agandapaha.
Da∙o a∙dok sorkarini gita kamrangna manderangko seokna a∙bachengpilon gital roster system ni gita chamdamberang kamko man∙gen ineba u∙iataha.
1972 ni state reservation policy ko nambatatna miksonganiara kamko sandienggipa Khasi jatni chadamberangna A∙chik jatrangna bate komie kam tikataha ine bebe ra∙ani ong.a
Indioba 2023 April jani 3 tariko Meghalaya High Court roster ni bidingo agantalate on∙aha aro ia roster system ni kamrang a∙dokni legislature aro executive ni jakosa ong∙a ine agane, ia roster system-ni bidingo jingjenganirang tom∙tomjana kingking kam nakatatanirangkoba dontonganiko dakangkugen ine parakataha.
