Shillong Medical College (SMC)-na National Medical Commission-oniko Letter of Permission (LOP)-ko man·soahani gimin skanggipa academic session-ko September jani bon·kamgipa an·tioni dipet class-rangko a·bachengatangna man·gnok ine Health Minister Ampareen Lyngdoh parakataha.
2025-2026 bilsini academic session-na National Medical Commission ge 50 MBBS seat-rangchi a·bachengna hukumko on·aha. Ian Health Department aro Meghalaya sorkarina namen katchabeani ong·a ine Lyngdoh aganangaha.
Admission-rangko national schedule-nigita NEET pass ka·gimino pangchake ra·gen aro gnigipa MBBS counselling-ko September 2026 bilsio ong·atanggen. Iako dakanichi a·doko da·o dipet chu·gimik ge 144 MBBS seat-rang dongaha, ge 50 Shillong Medical College-o aro ge 94 a·dokni quota-nigita NEIGRIHMS aro RIIMS-rango donga ine Lyngdoh agandapangaha.
Shillong Medical College-ko brownfield project-nigita chalaigen jeon Shillong Civil Hospital aro Ganesh Das Hospital-rangko skichakgipa hospital-rang dake jakkalgen. College-na skigiparangko sak 25 Assistant Professor post-rango gapataha aro adita senior faculty-rangko rimnapna biaprang dongkuenga. Ia bangbang ong·e dongkuenggipa biaprangko gapatna kamrangko ka·enga ineba Lyngdoh aganangaha.
Shillong Medical College-ni skanggipa Director ong·e kamko ka·angna RIIMS -ni ENT surgeon Dr. Nicola Gracyl Lyngdoh Langrai-ko donangaha.
Tura Medical College-ara greenfield project ong·skaani gimin gitalgipa nokrangko rikna nanga dongenga jekon Shillong Medical College-gita dongsogimin hospital-rangko jakkalna man·ja ine Health Minister Ampareen Lyngdoh aganangaha.
