Batanggimin ja 2 na sit in demonstration ko dake jingjengatenggipa GHADC ni Non-Gazetted Employees’ Association (NGEA) dolrang uamangna ja 5 ni dormahako on·chengna Executive Committee-ni tik ka·aniko da·al salni bako ra·chakna man·jawa ine jegalaniko dakangaha.
Indake ja 5 ni dormahako ra·chakna jechakengon Tura songjinmao knal pring 10:30 bajioni 2 bajiona dal·begipa rally ba re·jomaniko ong·atna tik ka·aha jeon Garo Hills-ni Civil Society Organisation (CSO) rang ku·cholsan jakko on·angenga.
NGEA-ni President, Brithen Sangma ni talatani gitade GHADC o kamko ka·enggiparangna ja 5 ni dormaharangko on·chengna tik ka·aniko mijal salni bako GHADC-ni Secretary parakaniko dakangahachim. “Iako chinga ra·chakna man·teljawa aro chingni jingjengataniko chinga ka·angkuaigen,” ine Sangma aganange uamangni dabiagita jean ja 44 ni chu·gimiko dormahako gamna nangtelaigen ine ua parakangaha.
NGEA dolrang an·tangtangni dormaharangko man·a sit in demonstration ko dake jingjengatani ja 2 ni gita ong·aha. Jingjengataniko dakengon uamangna bang·a CSO rang jekai GSU, AHAM, ACHIK, AAYF, GSU NEHU Cell, ANYO, NGCO, APE, FKJGP, ADE, AYWO, FAF aro uandake gipin dolrangba chakpaaniko on·angaha. Apsan dake ia somoirango warachakenggipa dolrangni MDC rangba uamang baksa ku·mongdilenga.
