Da·al salni bako Chief Minister Conrad K. Sangma, CM Connect Centre Tura-ko West Garo Hills a·jani Tura P A. Sangma Stadium-o oprake on·angaha. CM Connect Centre-ni office-ko oprake on·ani ja·mano CM Conrad Sangma an·tangan skanggipa badi ka·enba segate ra·angaha.
Ia oprakani tom·bimonganio Chief Minister Conrad Sangma, ia CM Connect-ni bidingo aganengon, CM Connect program ge·sa scheme-san ong·aija sorkari aro manderangni gisepo ma·sigrikgijani ba jajaanirangko bon·atani chol mingsa ong·a ine Sangma agananga. Ian dingtang dingtang gadango donggipa officer-rang aro dilgiparangko a·doko songdongenggipa manderang baksa apsan ong·e meli nangrime kam ka·na gisik nangataniba ong·a ine Sangma agandapangaha.
CM Connect-nigita manderang an·tangni nangnikani aro neng·nikanirangko ku·sik mingbongachi jekai Garo, Khasi, Pnar, English aro Hindi-chiba janapate segate ra·na man·gen. Ia neng·nikanirangko department-rangnigita bon·atna ba namatna tarakbate kamrangko ka·na man·gen ine Sangma u·iatangaha.
Mikkangchi ia apsandakgipa CM Connect Centre-rangko a·dokni ge 56 block-rango kulina miksonganikoba Sangma janapangaha jeon block headquarter-rango office nokko chonkale aro district headquarter-o dal·bate tarigen ine ua parakangaha. Iako dakanichi songdonggipa manderangni neng·nikani aro nangnikanirangko ba maiba kamrangni bidingo name ma·sijaenga ong·ode talbate u·iatanirangko dake sorkari baksa apsan meligrike ma·sigrikgijaniko bon·ate sorkari baksa sepangbate dongna man·gen ine Sangma aganangaha.
