Garo Hills ni chadamberangna public service ni a·bao name dake skie ra·ani cholko ra·bana A·chik Welfare Society (AWS) jean A·chik Baptist Krima No. IV ni ning·o Civil Service Coaching & Training Center ko Tura District Auditorium-o oprakangaha.
Ia tom·aniona Chief Minister Conrad K. Sangma mongsonggipa ong·e sokbae ia Training Center ko nokdonggae on·angaha. Meghalaya Legislative Assembly ni Speaker Thomas A. Sangma ba Guest of Honour ong·e re·baan baksana West Garo Hills ni Deputy Commissioner Vibhor Agarwal, GHADC ni Chief Executive Member Albinush R. Marak, WGH ni Sadar SDO Richa Kunkarni aro WGH ni Superintendent of Police Abraham T. Sangma ba bakko ra·angtokaha. Tom·aniko a·bachengatna Krima No. IV. ni President Julline Barnard K. Marak ni ku·rangchi bianiko dakangaha.
Chadamberangan Meghalaya a·dokni dal·batgipa bil aro gamjin ong·a jean a·dokni 50% mangni population ko man·gopa aro uamangko bida nigita, namgipa re·dilanichi aro cholrangko on·e dakchakna nanganiko Chief Minister Conrad K. Sangma aganangaha.
Civil service na tarisoenggipa chadamberangna namgipa ku·pattianiko on·an baksana uamangko an·tangtango bebe ra·china, bimchipna aro rake kamko ka·angna didiangaha. Unbaksana porikkana tarisamsona namgipa pora skianiko dakna nangchongmotaniko Chief Minister aganange, uni experience rangkoba parakange janggitanganio jegita neng·nikanirangko chagrongenchimoba skidapani chol ine ra·e chu·sokna ja·ku de·ani ong·a aganangaha.
Indakgipa ramako reanio ba baseanio mikkangchi pangnan mandetangko, songsalko aro a·songtangna on·pilna maming saloba gualjachina chadamberangko Chief Minister didiangaha.
Ia nokdonggaani somoio A·chik Welfare Society Chief Minister na minggni memorandumrangko on·angjolangaha jeon uamang ia gitalgipa Civil Service Coaching & Training Center ni classroom ba kutturirang, library, poraiani bosturang aro bang·a chatro chatrirangko rimnapna rika cho·anirangko namdapatna dakchakchina didiangaha. Gnigipao, Garo Hills-o drugs aro pekatgipa bosturangko jakkalgiparangni batrikrikani gisepo Rehabilitation Center ko rike on·chinaba mol·molangaha.
Da·o dipet ia Civil Service Coaching & Training Center-o napna sak 100 candidate rang application rangni on·anganiko man·sogenchimoba biaprang chu·ongagita dongjae sak 35 candidate rangkosan rimnapna man·kuenga ine parakangaha.
AWS ni ia kamko a·bachengataniara A·chik Baptist Krima No. IV ni Quasquicentennial Jubilee ko maniani somoorangonin ong·a aro uamangni indakgipa ja·ku de·aniko nike Thomas A. Sangma de·mittelangaha. Deputy Commissioner Vibhor Agarwal, uni UPSC porikkana bilsi 3 na tarisamsoaniko aro cha·tote nie maidakgipa skidapanirangko man·aniko janapange chadamberangkoba bimchipe jotton ka·china ku·pattianiko on·angaha.
Ia tom·aniko matchotatna AWSCSCTC Committee ni Dr. Sanggra A. Sangma mittelpilani kattarangko aganange bon·kame Hawakhana Baptist Church ni Pamong Rev. Frithing D. Sangma biangaha.
