A·dokni Autonomous District Council (ADC) rang adita kamrangko jekai staff-rangko gital daktaiani, kajinna ra·ani aro chu·gimik nirokaniko dingtangatja dipet council rangna tangka paisanigita dakchakaniko on·jawa ine Cabinet Minister Paul Lyngdoh aganangaha. Ian ADC-rangni tangka paisana neng·nikanirangko champengna aro dingtanganiko ra·bana miksonge dakchakenggipasa ong·a ine Lyngdoh aganangaha.
GHADC, KHADC aro JHADC-na gegittam sub-committee rangko songaha. Ia committee rang council-o tangka paisako jakkalanio dingtanganiko ra·baani, staff rangko nigrike kraa bewalo ra·ani aro somoigita dormaharangko on·ani bidingo name che·eme u·ie ra·enba sal 45 ja·man report-ko on·anggen.
Voluntary ba nangan somoio dakchakani aro nangchongmotgipana dakchakani dingtanggrikaniko ma·sie ra·chinaba Lyngdoh aganangaha. A·dokni damgni ADC-rang da·o tangkarangna neng·nikaniko man·enga. Uamang apsangipa kamrangko dakangkuaiode re·baenggipa bils 3 ba 4-on begrugen. Ia a·selrangona sokjanagita council-rang kam ka·anio dingtanganiko ra·bachinasa da·o a·dok sorkari tangka paisarangko on·e dakchakachi ADC-rangna cholko on·enga ine Lyngdoh aganangkuaha.
ADC-rangni obostarangko a·dok sorkari nie dongna man·ja, maibakai council-rang begruode manderang sorkarikosa sing·na a·bachenggen. Uni giminsa a·dok sorkari council-ni mamlao napana nangaha ine Lyngdoh aganangaha. Iako dakengon council-rang staff-rangko nangagita rakkianiko krae dakna nanggen aro tangka paisanigita baikamgipa ong·na ADC-rang re·mikkangna nanggen ine Lyngdoh agandapangaha.
