Tura Governor House-ko senior officer aro dingtang dingtang department rangni mikkango West Garo Hills a·jani Deputy Commissioner Vibhor Aggarwal, IAS, ni jakchi sea jota gnang Meghalaya Governor ni Commissioner & Secretary Dr. B. D. R. Tiwari, IAS ni jakchi rachake niamgita Raj Bhavan-na pakwatanganiko dakangaha.
Ia tom·aniona West Garo Hills, Tura ni Superintendent of Police Abraham T. Sangma, IPS, A. Lakiang, Joint Secretary to the Governor; D. Diengdoh, Assistant Executive Engineer, Raj Bhavan; C.K. Sangma, Executive Engineer, PWD (Building), Tura Sub-Division; Dominic Marak, Assistant Executive Engineer, PWD (Building), Tura Sub-Division aro gipin officer-rangba donge bakko ra·angaha.
Ia somoini bako Dr. Tiwari dingtang dingtang department rang jekai Agriculture, Horticulture, PHE, PWD (Civil & Electrical Division), Fire Service, Police Department (Special Branch), Home Guards, aro NCC baksa nangrime golpo chanchirimanikoba dakdilangaha. Chanchirimanio Tura Governor House ba Raj Bhavan ko maikai nitoatna, chi, bijoli aro nirokaniko namdapatna mangen uarangni bidingo golpoaniko dakangaha.
Una agreba Governor House ni sima ario champeng naljokaniko namdapatna barbed wire fencing koba dakchina Dr. Tiwari aganangaha. Apsan dake bijolina neng·nikjanagita gimiko name niroke donchina ge·etaha aro man·a dipet solar plant rangko bosaina aganangaha. Apsan dake Governor House o fire audit rangko dakenba nanga kamrangko matchotchina fire service department-ni manderangkoba didiangaha.
Una agreba wilwilako tangsekgilgil dake donagita plantation drive rangko dakchinaba didiangaha. Tura NCC rangnaba campus ning·ao dongchakna tarichinaba aganangaha. Ua ia somoio dingtang mancha Governor House ona napbachenggipao borangko rike donchina didiangaha maina ian A·chikrangni mikkim rasong, daka rika dakbewal aro jatni chinba ong·a ine ua agane department ge·antikon Tura Governor House ko nitoatna, silatna, aro kra gadango kam ka·na kragipa ong·atna gita bimchipe kamrangko ka·china didiangaha.
Tom·bimongani bon·kamao Dr. Tiwari Governor House-ko aro wilwila gimiko nirokeanikoba ka·angaha.
