A·doko bobil dake chakatgiparang apsan tom·taiani bidingo ong·katgipa koborrangko nikchangani ong·ja ine Chief Minister Conrad Sangma mijal salo aganangaha. Iani bidingo kakket ong·aniko parakatna skang name am·sandina nanggen. Sima ari jolrangoniko ia koborrangko man·soronga aro u·iatronga, indake ong·genchimoba bobil dolrang tom·taianiko ong·chongmotgipa ine aganaba man·taija, Sangma aganangaha.
Daito gnanggiparangna ia koborrang jringnan sokbaoba bang·bata changon jolni namgijagipa dolrang, ra·sruke cha·giparang, badingsrukgipa manderang ong·rongbata ine Sangma talataha. Indake u·iatanirangko pangnan man·soronga aro ia koborrangko nikgualna man·ja, unbaksana bobil dolrangni tom·taianikoba uamang an·tangtangaride u·ina man·taiskaja ine ua parakataha.
Bangladesh a·songni sima ari jolo batanggimin changrangko toate ia somoio obostarang namjabatroroaha. Bangladesh mija bilsigita apsangipa a·song ong·jaha aro namen dingtanggipa obostarang ong·katenga ine Sangma aganangaha.
Bobil dolrangni tom·taiani bidingo re·anggipa salrango DGP-ni agangipa mittam kattarangkosan ra·e manderangna u·iatnagita report-ko on·aha. Sima ari jolrango kobor man·soanirangkosa DGP agana jotton ka·aha indioba chu·gimik kattakode mesokjaha ine Sangma agandapaha.
