Da·al salo cabinet tom·anio Meghalaya Public Service Commission (MPSC) Reforms Committee, 2025-ni report-rangko ra·chakangaha jeon kamna rimnapani bewalrangko namdapatatna adita niamrangko dingtangataniko Cabinet tom·e chanchiangaha. Ia report-o MPSC-ko kakketo aro name chu·sokatnagita long-term, medium-term aro short-term-rangna nanggipa ja·kurangko de·e gital daktaina a·bachengataha.
Short term-ni ning·o janapanggiparangara interview-ko ta·rakatna interview board-rangko bang·batatna, interview-o maidake kamrangko ka·ani niamrangko u·iatani, board-ni mande interview-o mandetangko mikkang niteaniko, Chairman aro Committee member-rang gam dongako aro gamna nanganirangko parakchina ine tik ka·angaha. Unbaksana bilsini report-rangko mesokna man·agita bilsi gimikna MPSC-ni kamrangna calendar-ko tarichina, neng·nikaniko man·enggiparangna dakchakgipako a·bachengatchina, kamna rimnapani somoioba candidate-rangni roll no. rangko dingtangatjachina, personal interview-ni mark-rangko candidate-na aro jinmana u·iatchina, question paper-rangko name simsake rakkichina jedakode question paper-rangko porikkana skang man·sojanagita, kamrangna rimnapna a·bachengani somoio maming dingtangataniko dakjachina, kamrangna chamgiminko jinmana u·iatchina, changgipino namdapatna man·agita porikka seani ja·mano aganchakanirangko u·iatchina aro Meghalaya Lokayukta Act, 2014-o pangchake namgija kamrangni kosako mikrake dongna nangchongmotaniko janapangaha.
Medium aro long-term-ni ning·o janapanggiminara porikkako computer-gita ra·china, Jowai aro Tura-o MPSC-ko nirokggiparangko simsakatchina, apsan gadango ong·giparangko ru·utatgija apsan porikka ra·china aro MPS ba MCS porikkarango dakagita optional paper-rangko jakkalangjachina chanchiangaha. Una agreba kakketo porikkako ong·atnagita aro u·inagita CCTV-rangko tekchinaba cabinet janapangaha.
