Gambegre, August 26, 2025: District Hub for Empowerment of Women (DHEW) aro West Garo Hills a·jani District Social Welfare Office apsan bakrime Dilni Bolchugre, Monfort Secondary School o Beti Bachao Beti Padhao, RKSK, One Stop Centre aro Nasha Mukt Bharat Abhiyaan ni bidingo mikrakatani tom·bimonganiko ong·atangaha.
Ia tom·anio DHEW Tura ni Financial Literacy Specialist, Draisborn Sangma; Tura ni District Social Welfare Officer, M.O.T. Sangma; Dilni Bolchugre, Monfort Secondary School ni Principal Brother Polycary aro Vice Principal Daniel M. Sangma; Tura DHEW ni Gender Specialist Chenziang N. Sangma aro Darengre PHC ni M&HO Dr. Galchi Sangma ba bakko ra•angaha.
Ia tom·anio dingtang mancha chatro chatri aro chadamberangna songsalna maidakgipa obostarangchi neng·nikanirangko ra·baenggiparangko maikai champengna man·gen aro sorkarini scheme-rangni gamchatani bidingo talate on·angaha. Ia somoio drugs jakkalaniko champengani bidingo aganan baksana be·en bimangna aro janggitanganina indakgipa pekatgipa bosturangni namgijaniko ra·baani giminba talatangaha. Una agreba me·tra, ma·giparang aro me·chik bi·sarangna One Stop Center-ni gamchataniko aro uamangna maidakgipa dakchakanirangko ra·bana man·ani bidingoba agan talataniko dakangaha.
Apsan dake an·tangtangni janggi tanganio rongtal an·tale dongani cholrang aro uni gamchataniko chadamberangna skie on·angjolangaha. Program-ni bako Beti Bachao Beti Padhao campaign-ni giminba adita u·i ma·sina nangchongmotgiparangko talatangaha aro iasan ong·aigija me·chikrangna dongipa adita gamchatgipa sorkarini scheme-rangni bidingoba u·iatangaha.
Uandake tom·bimongani bon·kamao daldrobaenggipa me·trarangna rongtal an·talaniko aro an·seng baljokaniko namdapatna miksonge sanitary pad rangkoba suale on·angaha.
