Chief Minister Conrad Sangma da·al salo council-ni obostarangko nirokatna Garo Hills Autonomous District Council (GHADC) ni CEM aro Deputy CEM, unbaksa dingtang dingtang member-rang aro official-rang baksa apsan tom·e chanchirimangaha. Ia tom·anio Additional Chief Secretary, Finance-ni Commissioner Secretary, District Council Affairs-ni Commissioner Secretary aro dingtang dingtang gadangni officer-rangba dongpae bakko ra·angaha.
Ia chanchirimanio November 1 tarikoni a·dokni damgittam Autonomous District Council (ADC) rango tangka paisanigita neng·nikanirangko nike dormaharangko watatna sorkari tik ka·angaha ine Chief Minister Conrad Sangma parakataha. Council jatna gamchatbegipa aro daka rikaniko mesokgipa chin ong·a ineba Sangma aganangkuaha.
Council-ko chalainagita dingtang mancha autonomous body ong·e uamangnan bilko on·manaha. A·dok sorkari maming saloba jak dangdikja aro adita bakrangosan bilko man·paa ine Chief Minister aganangaha. Indake ong·genchimoba Garo, Khasi aro Jaintia Autonomous District Council (ADC) rango tangka paisanigita neng·nikanirangko nike sorkari ia ja·kuko ga·aona sokaha ine Sangma agandapaha.
Sorkari ADC-rango kam ka·giparangna dormaharangko on·a dakchakengoba council-ko chalaianio maming jakdangdikani dongjawa. Ia dormaharangko ADC-rango tangka paisa jakkalaniko name mangrakbatatna aro dingtanganiko ra·banasa ong·a ine Sangma parakangaha. Ia ja·kuko a·dok sorkari Meghalaya-ni Governor CH Vijayashankar aro GHADC-ni seoka man·gipa MDC-rang baksa chanchirimani ja·mano tik ka·aha ine Sangma aganangaha.
