Pekatgipa bosturangko badingsrukanirangko champengna West Garo Hills a·jani Anti Narcotics Task Force (ANTF) dolrang rakbee kamrangko ka·enganio sakgni manderangko rim·na man·aha ine koborna parakataha. Uamangko rim·na man·aniara, Guwahati-oni Tura-ona re·gipa night super bus (ML 08 G 0799)-o pekatgipa bosturangko badingsrukna ra·barongenga ine koborrangko man·soe chu·sokaha ine aganaha.
Rim·ako man·giparangoni saksara New Tura Captain Bagan gittimni Cheyanjring R. Marak aro sakgipinara Tura Wadanang Jangga gittimni Jemisha A. Sangma ong·a. Uamangoniko a·mang rong aro komila rong dakgipa bostu jean 09.87 gram ong·gipako man·aha jekon heroin ine ANTF dolrang chanchipe aganaha. Uamangni kosako dongimin niamo pangchake mokordoma ka·angaha aro nambate am·sandianirangko dakangkuenga ine ANTF dolrang parakataha.
Unbaksana indake pekatgipa bosturangko badingsrukaniko champengna kamrangko ka·engani gisepon songsalo janggi tangenggipa sakantiko nikgenchimode ba u·igenchimode bakan ANTF dolrangna koborrangko on·chinaba didiangaha.
