Garo Hills-o tourism-ni a·bako tang·doatna aro niksengatnagita Mahendraganj constituency-ni MLA Sanjay Sangma Garo Hills-ona skanggipa changna Jetski Model Sea-Doo Spark-ko ra·bae Kalaichar-o donggipa an·tangni pokkrio chalaie niangaha. Ia Jetski-ko Garo Hills-ona ra·baani miksonganiara, songadam noksiko songdonggiparang indakgipa bosturangko nike aro jakkale tourism-ni a·bako tang·doatani ong·a ine ua aganaha.
Ia Jetski-ko Navnit Marine Company-ni Marine Jetski Technician Johnson Victor chalaie mesokangchengaha. Uni ja·mano MLA Sanjay Sangma-ba chalaie niangan baksana SWGH-ni DSEO Emphul Ch. Marak-ba chalaie niangaha. Indake ong·genchimoba pokkriko tarianirang name matchotkujaengani gimin ia watercraft-ko jinmana jakkalna on·kujawa ine aganangaha. Iako janapengon mikkangchi watersports-na gisik nanggiparang aro nina re·bagiparang ia Jetski bike-rangko chalaie an·sengangna man·gen ine Sangma aganangaha.
