Da·ororo Garo Hills-o ong·enggipa minggni obosta chong·motan Garo Hills Autonomous District Council (GHADC)-o kam ka·giparangna dormaharangko on·kujaenganina aro Tura Medical College and Hospital (TMCH)-ko Public-Private Partnership (PPP)-ni ning·o private entities-rangna pakwatna dorgastoko on·ani bidingo Garo Hills-ni Civil Society Organization (CSO)-rang jekai AYWO, FKJGP, GSU, ADE aro FAF dolrang uamangni nangnikanirangko chitti see parakangaha.
Skanggipao, uamang GHADC-ni Non-Gazetted Employees Association (NGEA) dolrang an·tangtangni dormaharangko man·kujaengani jingjengataniko dakenganina suk ong·gijaniko aganangaha. GHADC-ko niam tarianio niksenggiparang jekai Gopinath Bordoloi aro J.J.M Nicholas Roy maanggita jatni daka rikaniko, jattangni niamo aro Meghalaya-ni tribal jatrangni bilko jakkalirangko Indian Constitution-ni Sixth Schedule-o pangchake chel·chake chalainasa miksonganirang gnang. Indake dingtang dingtang gadango dilenggiparang jolni nanganirangna chong·motan a·arangko nirokanioni jatni daka rikaniona kingking biltangchi silroroatna GHADC-ni kaman ong·a ine uamang janapangaha. Iani gisepon, namgija jakkandilanichi, tangka paisarangko simsakgijanichi, aro ong·gija kamrangni a·selo niamko ja·rikaniko gimaatangengaha ineba uamang aganaha.
Indake ong·engon, da·o Executive Committee (EC) jekon Albinush Marak dilenganio, NGEA dolrangni niamo pangchake dabianiko u·igenchimoba dingtang dingtang ong·gijagipa kattarangko agane bon·atenga jeon namgijagipa dilgipa ong·aniko mesokani ong·a ine uamang aganangaha. Da·o EC-ko chalaienggiparang GHADC-ni tangka paisarangko jakkalsrete aro mandetangko kamna rimnapani a·selo ja 43 na bate dormaharangko on·a man·jaengaha jeon GHADC-o kam ka·giparang tangka paisarangna neng·nikaniko man·e janggi tangna sro sname kratchaaona sokatengaha ineba janapataha. Indake mikkangchi dormaharangko on·angjaode GHADC bon·aba gnang maina ian dongimin niamko pe·ani, kam ka·giparangni bilko gimaatani aro kakketgijani ong·a. Unbaksana ian GHADC-ko chalaina man·gijanisan ong·aigija manderangni gisik ka·tongkoba cha·bokani aro manderangna dangdike on·a ku·chakaniko pe·aniba ong·a ine uamang aganangaha. Indakgipa obosta ong·enganina man·a dipet man·a nanggni dormaharangko on·a ta·rake kamko ka·china aro tarigimin Service aro Finance Rules-o pangchake GHADC-ni transaction-rangko digitalised ka·an baksana ia council bon·chipjachina Public Accounts Committee (PAC) ko songe on·chinaba sorkariko didiangaha.
Gnigipao, Tura Medical College and Hospital (TMCH) jekon ma·mong sorkari aro a·dok sorkarini gisepgriko 90:10 ratio chamgipa scheme Garo Hills a·jao sanna bannaniko namdapatna aro medical-ko skie ra·na namgipa chol ong·enga. Garo Hills jolo sanna bannaniko dakna namgipa rika cho·anirang komiani gisepon aro jolni chadamberang medical-ni a·bao skie ra·na ia TMCH namgipa chol ong·enga. Indake ong·engon ia TMCH-ko PPP model-ni ning·o private entities-rangna jako ra·na dorgastoko pakwatanina uamang raken jegalaniko dakenga maina uamangna pakwatgenchimode TMCH-ko jinmani namgnina jakkalna aro korosrangni bidingo namen jajrengsoani ong·enga ine uamang janapataha. Ia PPP model-na jako ra·na on·aniora sakantini namgnina chanchiana bate man·gnina chanchina kensoani gnang jeon sanna bannaniko dakna adita manderangsan korosrangko amchakaigen ine uamang janapaha. Unbaksana TMCH-o jolni chatro chatrirangna 50% seat-rangkosan on·ani gnang jeon Assam-ni government college-rango 85% on·ako tosusae niatgenchimode namen komia maina jolo songdonggiparangna apsan cholko man·a ka·dongsoesa TMCH-ko rikna a·arangko on·aha ineba uamang janapangaha. Iani gimin TMCH-ko a·dok sorkari jako ra·genchimode jolni chadamberang 85% seat-rangko man·an baksana manderangna nambata sanna bannani gadangko man·gen aro tangka paisana rikaigija sakantinan apsan cholko on·a man·gen ineba aganangaha.
Una agreba ia minggni obostarangni bidingo poster campaign-ko mijaloni a·bachengataha aro knalo matchotatgen ine u·iatan baksana Sombar sal chong·motan August 25, 2025 tariko 12 bajioni 2 bajiona dokanrangko chipchinaba u·iatangjolaha.
