Garoland State Movement Committee (GSMC)-ni dilgiparang A·chikrangni nanganirangko Rastrapati Bhavan, New Delhi-o India-ni President Droupadi Murmu-ko grongenba agangrikna cholko man·angaha ine GSMC-ni Assistant General Secretary aganangaha.
India gimikni Tribal-rangni tom·bimonganio sak 6 kosan India-ni President-na nanganirangko agana on·anio A·chik a·songni neng·nikanirangko agana Garo Hills Autonomous District Council (GHADC)-ni gitcham Chief Executive Member (CEM) Boston Ch Marak-ba cholko man·angaha.
Tribalrangni tom·bimonganio Boston Ch Marak-ni agangipa kattarangara A·chik ku·sikko 8th schedule-o ra·gatchina aro A·chikrangna Garoland ba dingtang a·dokko on·china aganangaha. Agreed Text of Settlement-ko a·dok sorkari aro ma·mong sorkari baksa 2014 bilsio ka·gipa ta·raken chu·sokate on·chinaba janapangaha. Iako chu·sokate on·genchimode ma·mong sorkarini chamatgipa tangka paisarangko a·dok sorkariona nangatjagenchimode da·o GHADC-o neng·nikani dongjawachim ineba agandapangaha.
A·chikrangna a·dok dingtangko dabianirangko A·chikrangoni gitcham dilgiparang jekai Sonaram R Sangma, Mody K Marak, Emonsing M Sangma, Clifford R Marak aro Purno K Sangma ia dabianirangko dakdilangaha.GSMC dolni dilgiparang New Delhi-ona re·ange Garoland-na dabianiko dakgiparangara Acting Chairman Balkarin Ch Marak, Publicity Secretary Chevibirth K Marak, Assistant General Secretary Tony Balsam Ch Marak, Organising Secretary Jason Tekrang M Sangma, Amrish Ch Marak, GHADC-ni gitcham CEM Boston Ch Marak aro East Garo Hills-ni dilgipa Thomas N Marak gisik nange India-ni skotong songjinmaona re·angaha.
Garoland-na dabianio A·chik a·songni manderangni ku·cholsan ja·ku ga·anichi aro Nokgipa-o bi·chakaniko dakanichi indakgipa a·songni chugipa gadangni dilgiparangko grongna cholrangko man·enga ine GSMC-ni dilgiparang aganangaha.
