Garoland State Movement Committee (GSMC)-ni dilgiparang Article 3 Constitution-ni ning·o pangchake a·dok dingtangna dabianiko dakna Tribal Affairs Minister Jual Oram-ko New Delhi-o uni office-o gronge memorandum-ko on·angaha.
Ia dabianiko skanggipa changna 1895 bilsio A·chikrangni saksa Matgrik Sonaram R Sangma sagi, British-rangni sasonni ning·ao dongmitingo India a·songni jakgitel ong·anina dakgrikna skangan dingtang a·dokna ku·rang on·e dakdilchengaha. Uni jamano Mody K. Sangma sagi, Emonsing M. Sangma sagi re·dilangskaaha.
Tribal Affairs Minister-ko gronganio uamang Garo Hills Autonomous District Council (GHADC)-o kam ka·giparangni ja 43-ni dormaharangko man·kujaenganiko nirokatchina aro GHADC-ni MDC-rangni Session Hall aro GHADC Administrative Complex-ko rike on·chinaba janapangaha.
Una agreba A·chikrangni Wangala manianiko a·songni maniani ine ra·chakchinaba GSMC-ni dilgiparang dabianiko dakangaha. A·chikrangni daka rika bewalrangko ripingna man·agita skie ra·chakna Nokpanteko rike on·chinaba Tribal Affairs-o GSMC dol mol·molangaha.
Uamangni dabianiko constitution-nigita nianiko dakangna Jual Oram ka·donganiko on·ataha ine GSMC-ni Assistant General Secretary Tony Balsam Ch Marak aganangaha.
