South West Garo Hills a·jani dam bri C&RD Block-rangko Meghalaya Community & Rural Development (C&RD)-ni Minister A T Mondal da·al attamo bon·kame nirokaniko dakangaha. Minister-ni nirokaniko dakani somoio Salmanpara-ni MLA Ian Botham K. Sangma, SWGH-ni Deputy Commissioner Hema Nayak, DRDA-ni PD, R Z D. Shira aro Rangsakona-ni MLA Subir Marak-ba dongpaaha.
Meghalaya Community & Rural Development Minister, Rerapara aro Zikzak Block-rango gital rikenggipa block office nokko niangan baksana Purakhasia-o Nokma-rangni block office complex rikna on·gipa a·akoba nirokangaha. Ia dam bri block-rangko re·ange nirokaniko dakanio A T Mondal songni manderang baksaba agan golpogrikjolangaha.
Ia dam bri Block-rangko re·ange kamrangko u·ie ra·ani ja·mano ua Salmanpara-ni MLA, Deputy Commissioner, Project Director, DRDA, dam bri block-rangni BDO-rang, aro dingtang dingtang a·jani officer-rang block-rangni nanganirangko, MGNREGA-ko jakkalaniko aro ma·mongoni chamatgipa bang·a scheme-rangni bidingo Ampati circuit house-o tom·e chanchirimanikoba dakangaha.
Block ge·antiko nipilaniko dakanian sorkarini Block-rangko namroroatna miksonge ja·pangoni tangdoatna jotton ka·e kam ka·ani ong·enga.
