South West Garo Hills-ni Ampati Multi Facility Centre-o Meghalaya Right to Public Services (MRTPS) Act 2020-ni bidingo chatro chatrirangna mikrakatani program-ko District Administration da·al salo ong·atangaha.Ia program-ko Higher Secondary School-ni gadango poraienggipa chatro chatrirangna MRTPS Act 2020-ni bidingo dingtang dingtang department-rangni dakchake on·anichi aro MRTPS Act portal-ni kam ka·anirangko u·ie ma·sie ra·aniko on·a miksonge ong·atangaha.
Ia program-o dingtang dingtang departmentrango kam ka·giparang baksana District Administration bang·a departmentrango kamrangko nakatataniko maikai chatro chatrirang portal-oniko nie ma·sie ra·aniko dakna nanganiko talate on·angaha.
Meghalaya Right to Public Services (MRTPS) Act 2020-ni bidingo agan skie on·aniko dakgiparangara Assistant Commissioner M.K. Wankhar, District Informatics Officer Eliber A Marak, Labour Inspector Charlene B Sangma aro Enforcement Officer Bentham Jeremy R Marak, chatro chatrirangna skie on·angaha.
Ia apsan dakgipa program-ko re·baenggipa August 21 tarik 2025-o Rerapara C&RD Block-ni Office-o aro August 29 tarik 2025-o Purakhasia Multi Facility Centre-o ong·atangskagen ine District Administration u·iatangaha.
