Garoland State Movement Committee (GSMC)-ni dilgiparang a·dok dingtangna dabianiko dakna Delhi songjinmao-na re·ange robibar salo Tribal Mocha of India BJP-ni President Samir Oruon-ko grongenba tom·e agan golpogrikaniko dakangaha.
Tribal Mocha of India-ni President baksa adita A·chikrangni nanganirangko aro Garo Hills Autonomous District Council (GHADC)-ni neng·nikanirangko janape agangrikaniko dakon Garo Tribal-rangni neng·nikaniko niate chu·sokate on·a Samir Oruon ku·rachakaha. Mikkangchi A·chik-rangni neng·nikanirangko chu·sokate on·genchimode ia A·chik a·song gimikni mittelpilskani ong·skagen ine GSMC Tura-ni Organising Secretary Jason Tekrang M Sangma aganangaha.
A·songni skotong songjinmaona A·chikrangni nanganirangko agangrikna re·anggipa GSMC dolni dilgiparangara Acting Chairman Balkarin Ch Marak, Assistant General Secretary Tony Balsam Ch Marak, Publicity Secretary Chevi K Marak, Organising Secretary Jason Tekrang M Sangma aro Amrish Marak ong·a. A·chik a·songna bang·a dabianirangko dakanio ma·mong-ona sokatna jat gimik ku·mongenganina aro mikkangchi Garoland a·doko man·kujana kingking kingkot ja·ku ga·aniko jaktuwatgija ku·mongangnaba GSM dolrang mol·molangaha.
